Acto Inaugural Microrrede "A Mariña entre bambolinas"

A Microrrede de Bibliotecas Escolares da Mariña inaugura a exposición “A Mariña entre bambolinas” cun acto que convida á reflexión e á creatividade teatral

Esta tarde, tivo lugar o acto de inauguración da exposición “A Mariña entre bambolinas”, un proxecto colaborativo promovido pola Microrrede de Bibliotecas Escolares da Mariña ao abeiro do Plan de Mellora de Bibliotecas Escolares (PLAMBE), co obxectivo de implicar á comunidade educativa no fomento da lectura e da expresión artística a través do teatro.

A xornada comezou cunha cálida benvida feita pola nosa compañeira Xiana, mestra de cerimonia, na que se destacou a importancia desta iniciativa, que xa leva catorce edicións consecutivas promovendo a lectura e a cultura entre o alumnado e as súas familias. A proposta deste ano, centrada no lema “A biblioteca escolar, a escena”, pon o foco no teatro como ferramenta educativa, emocional e social, convidando a explorar múltiples perspectivas e realidades dende as táboas.

O acto contou coa presenza institucional de Mariña Gueimunde, alcaldesa do Concello de Viveiro; Sagrario Sánchez Ramil, xefa territorial de Cultura, Educación, Formación Profesional e Universidades; Montserrat García Lozano e Roberto Jurado, inspectores de Educación; e Alexandra Cabana Outeiro, asesora da Zona Norte da Asesoría de Bibliotecas Escolares, que puxeron en valor o papel dinamizador das bibliotecas escolares e o compromiso dos centros implicados.

O cartel de mostra foi realizado por Laura Mosquera García, alumna do Bacharelato de Artes do IES Monte Castelo de Burela. A organización tamén agradeceu o traballo do departamento de Artes Plásticas e do profesor César Losada Romero, así como de todo o alumnado participante.

O acto tivo como convidado especial ao dramaturgo Carlos Labraña, referente do teatro infantil e xuvenil en Galicia. Labraña compartiu co público o seu proceso creativo e a visión comprometida da súa obra, na que mestura humor, poesía e denuncia social, tratando temas tan relevantes como o feminismo, a memoria histórica ou os dereitos da infancia.

A exposición permanecerá aberta ao público ata o xoves, en horario de 18:00 a 20:00 horas. Durante esta semana tamén haberá representacións teatrais a cargo do CEIP Vista Alegre, a Escola Infantil San Roque, o CEP Lois Tobío e a agrupación Mecanismo.

O alumnado do IES Vilar Ponte e o CEIP O Vicedo foron os encargados de pechar a xornada inaugural con pezas de microteatro.

A organización agradeceu a colaboración das entidades participantes, especialmente do CFR da Mariña, os Equipos de Dinamización da Lingua Galega e a Asesoría de Bibliotecas Escolares, e fixo un chamamento a continuar promovendo espazos de lecer, creación e reflexión para a mocidade a través das artes escénicas.

Poden acceder ao albúm de fotos aquí.

Entramos en escena en 3, 2, 1 .....!

Xa está aquí o programa da nosa exposición anual, que este ano leva por título “A Microrrede entre bambolinas”.

Na inauguración acompañaranos Carlos Labraña, recoñecido dramaturgo, actor e autor de teatro infanto-xuvenil, que nos guiará nun percorrido polo apaixonante mundo do teatro, o xénero protagonista deste curso nas Bibliotecas Escolares.

Do 13 ao 15 de maio, de 18:00 a 20:00 h, o salón multiusos do Concello de Viveiro acollerá esta mostra chea de talento e colaboración. A exposición inclúe 10 traballos creativos, 5 representacións teatrais e unha pequena obra colectiva de monicreques que promete sorprender.

Un ano máis, apostamos pola diversidade de estilos narrativos e artísticos, cunha boa dose de imaxinación e orixinalidade.

PROGRAMA:

Cartel gañador A Mariña entre bambolinas

Xa temos cartel para a exposición da Microrrede!

Queremos dar as grazas ao alumnado do Bacharelato de Artes do IES Monte Castelo polo seu talento e implicación neste proxecto. En especial, recoñecemos o traballo de Laura Mosquera García, autora da imaxe que poñerá cara á nosa exposición e que simboliza a creatividade e o espírito colaborativo desta iniciativa.

 📍Salón Multiusos do Concello de Viveiro 

🗓️Entre o 13 e o 15 de Maio. 

🖌️ Deseño do cartel: Laura Mosquera García

Reunión dos membros da Microrrede - A Mariña entre bambolinas

O pasado 29 de abril voltamos a xuntarnos cheos de ilusión para dar os últimos retoques á planificación da nosa exposición: A Mariña entre bambolinas.

Durante a reunión, pechamos as actuacións que levarán a cabo os centros participantes, fixemos listaxe do material necesario e tomamos unha decisión moi especial: preparar un pequeno agasallo para premiar o talento das nosas pequenas e pequenos actrices.

A exposición celebrarase en Viveiro, do 13 ao 15 de maio, e xa estamos desexando compartila con vós.

Moi pronto anunciaremos o cartel gañador e publicaremos o programa completo. Estade atentos!

Formación do profesorado en teatro

Durante tres días, o profesorado participou nunha enriquecedora formación sobre teatro impartida por dous destacados relatores especializados en artes escénicas. A formación combinou teoría e práctica, abordando técnicas de interpretación, expresión corporal e dinámicas creativas para aplicar na aula. Os relatores ( Miguel Guido e Pablo Reboleiro) guiaron aos docentes a través de obradoiros interactivos que fomentaron o traballo colaborativo, a improvisación e a creación de pezas teatrais. 

Ademais, ofrecéronse ferramentas pedagóxicas para integrar o teatro como recurso educativo, promovendo o desenvolvemento de habilidades comunicativas, emocionais e sociais no alumnado. Esta experiencia deixou ao profesorado inspirado e preparado para levar a arte teatral ás aulas dun xeito innovador e significativo.

Grazas ao CFR de Burela por esta formación que nos axudará moitísimo para a nosa labor educativa. 

Ratígoras no IES Illa de Sarón

 [A mascota de Bibliosarón (Billa) está en paradoiro descoñecido. No seu lugar en Xove hai un ratiño espelido, moi parecido a Ratatouille, que lle pide axuda a Ratígoras para atopala. A cambio, fálalle doutros bibliobuses e das furgotecas, que Ratígoras descoñecía e que son o destino ao que o ratiño afrancesado quere ir.

Pescudando, averiguarán entre os dous como ir dende A Mariña ata algunha das localidades do interior da provincia de Lugo onde fai parada unha das furgotecas. Decataranse axiña das nosas carencias en canto a vías de comunicación]

https://www.cultura.gal/gl/furgoteca

https://www.ccbiblio.es/dia-del-bibliobus-en-espana-28-de-enero-de-2024/

https://www.mapasdeespana.com/provincia/mapa-provincia-lugo

https://turismo.deputacionlugo.gal/sites/deputacionlugo.org/files/inline-files/Mapa.pdf

Ratígoras no IES Vilar Ponte

 ESCENA 5

Personaxes:

·Josefina
·Platanito
·Ratígoras

(O bibliobús segue o seu percorrido polas bibliotecas e vaise facendo de noite. De súpeto, Ratígoras atópase dous personaxes no medio da escuridade farfallando algo inintelixible).

RATÍGORAS: Quen anda aí? Estou armado! Teño toda a colección de enciclopedias universais!

JOSEFINA: Por fiiiin! Axuda, axuda por favor!

PLATANITO: Siii, axuda! 

RATÍGORAS: MAAAAN, LUUUUUZ POR FAVOOOOR! 

(Unha man dun alumno achega unha vela)

RATÍGORAS: Ben, con isto chegará. Que susto me destes! Que pasou aquí?

PLATANITO: Es o famoso Ratígoras? Que ben, que boa sorte! Eu son Platanito e esta é Josefina. Vivimos aquí, na biblioteca do IES Vilar Ponte, estabamos cos rapaces hoxe lendo un libro no recreo e….

JOSEFINA: E ENGANCHOUNOS!

PLATANITO: Si, enganchounos, estamos enganchados!

RATÍGORAS: Non podedes soltalo?

JOSEFINA: Non, é imposible, fíxosenos de noite lendo.

RATÍGORAS: A ver, deixádeme intentar axudarvos…

(Ratígoras tenta soltalos á forza, pero non hai maneira).

RATÍGORAS: Non hai maneira, amigos. Creo que a única forma de solucionar isto é que o rematedes.

JOSEFINA: O que? O libro? É que non vemos nada!

RATÍGORAS: Un momento! MAAAAAANS, LUUUUUUZ!! 

(Aparecen máis mans de alumnado con máis velas).

(Josefina le as dúas frases finais do libro e tanto ela como Platanito son libres).

JOSEFINA E PLATANITO: Beeeen! Moitísimas grazas, Ratígoras! 

RATÍGORAS: De nada, amigos. Marcho, que teño que marchar: aínda quedan moitas bibliotecas que visitar.

JOSEFINA E PLATANITO: Boa viaxeeee!

Fin da escena

Ratígoras no IES María Sarmiento

 Título: A CAVERNA

Personaxes:

• Ratígoras

• Patágoras

• Sópates

• Patón

Escena 4: 

(RATIGORAS está na biblioteca lendo un libro. ao seu redor hai moitos de gran formato e estanterías repletas de exemplares. Ratígoras está encerrado nunha urna acristalada, Aparecen en escena PATÓN, PATÁGORAS E SÓPATES, tres filósofos movidos pola fama de sabio de RATÍGORAS.)

PATÓN: Oh, gran Ratígoras! Vimos coñecerte  porque din que es o máis sabio do María Sarmiento!

PATÁGORAS:  Oh, gran Rato!  Es o máis sabio de  todo Viveiro!

SÓPATES; Oh gran Roedor! Aínda moito máis! Es o máis sabio de toda A Mariña!

(RATÍGORAS  deixa o libro e mira cara a eles)

RATÍGORAS: Non sei de onde sacastes iso. Pois eu só sei que non sei nada…

PATÓN: Como que non sabes nada? Algo saberás, pois a túa fama precédete.

RATÍGORAS: (Indicando para as estanterías) Ves estes libros? Pois hai moitos dos que non sei nada. Hoxe comín un pouquiño deste. (Enfoca un libro grande azul). Sabía algo salgado pois fala dos mares e océanos e de postre collín unha novela de piratas… sabía a bombón de trufa. Queredes probar? Porque non hai sabiduría se non se saborea o coñecemento.

PATÁGORAS: Eu  xa coñezo o mar, está aquí ó lado.

RATÍGORAS: Pero eu podo ver e imaxinar todos os mares do mundo sen saír de aquí.

PATÓN: Tamén tes que saír da biblioteca e coñecer a verdadeira realidade. Ven con nós no bibliobús e coñecerás todas as bibliotecas da Mariña.

SÓPATES:  Nós si que che ensinaremos os tesouros das outras bibliotecas.

(Convenceron a Ratigoras e marcha con eles no bibliobús a buscar eses tesouros das bibliotecas)

Xornada de bibliotecas escolares 2024

 Hoxe, na Xornada de bibliotecas escolares de Galicia presentamos o noso traballo da Microrrede e compartimos mesa de experiencias con Cristina Campos Pérez ( CEIP A Lama- Pontevedra)

Grazas á Asesoría de bibliotecas por convidarnos e difundir o noso traballo nestas Xornadas. 

#XBEGA24

Ratígoras no CEIP Plurilingüe de Covas

 ESCENA 3

Narrador: Ratígoras esperta despois do trompazo dentro da urna. O bibliobús seguiu o seu camiño pero  Leo Leo xa non está!!! No seu lugar hai hai un paxaro azul moi raro.

Ratígoras: Vaia golpe levei!!! ohhh! (mira a Lolo sorprendido e apampado polo golpe). Onde estou? Pero ti quen es?

Lolo: Son Lolo, a mascota da Bibliocovas, benvido á miña casa! Como me gusta ter visitas!

Ratígoras: Eu son Ratígoras. E viaxo no Bibliobús por todas a biblios molonas,

Lolo: Pero entón que fas metido nunha urna? Sae de aí, que che ensino a miña casa. A ver como te poido sacar de aí. (Lolo ponse pensativo)

Ratígoras: Xa sei! Coa miña corda máxica! Agarda que a teño na mochila (Saca a corda da mochila e lánzalla a Lolo) Agárraa, Lolo!

Narrador: Lolo tira con forza e saca a Ratígoras da urna.

Lolo e Ratígoras: Ah! (berrando)

Lolo: Por fin! Mira, ven, que che ensino a miña casa.

Narrador: O rato e o paxaro pasean amigablemente pola Bibliocovas charlando. Despois da visita, regresan ao bibliobús.

Lolo: Foi marabillosa a túa visita. É unha mágoa que non te poidas quedar máis tempo (di  con pena). En serio que te vas a meter de novo nesa urna? (di estrañado)

Ratígoras: Encántame a miña urna: é o meu fogar. Que gañas tiña de volver a estar aquí (di encantado meténdose dentro)! Moitas grazas, Lolo!! Repetirei a visita noutra ocasión!! (dío canso, pero feliz)

Lolo: Aquí te agardo coas ás abertas!!! 

Narrador: Ratígoras cae rendido na súa urna, o bibliobús arrinca e a viaxe segue o seu camiño.

Fin da escena

Ratígoras no CEIP do Vicedo

 CEIP O VICEDO ( 22 ao 29 de Outubro)

 

ESCENA 2

Cando as luces do Bibliobús se apagan Ratígoras queda sumido nun profundo sono. Tras unha longa viaxe o Bibliobús chega ao Vicedo. Daquela entra en escena Leo-Leo, a mascota do cole do Vicedo, interesado en coller un libro daquel bibliobús. Alí atópase con Ratígoras durmindo placidamente dentro da súa urna.

Leo-Leo (sorprendido): Por todas as miñas plumas! Hai un rato durmindo nunha furna!! Que biblioteca máis rara! Vouno espertar, a ver que fai aquí.

Ratígoras continúa roncando e o bufiño golpea a urna co fin de despertar ao rato.

Leo-Leo: Oes, rapaz? Estás ben? Quen te encerrou nesa urna?

Ratígoras (abraiado): Quen, eu? Ratígoras? Encerrado nunha urna? Eu son libre coma o vento! E ti quen es?

Leo-Leo -que non ententía nada do que alí estaba acontecendo-  díxolle:

Leo-Leo: Eu son Leo-Leo, a mascota da biblio do Vicedo e se dis que es libre coma o vento, bótate cinco pasos para adiante e vénme saudar.

Sen esperar un intre Ratígoras avanza e pega de fuciños contra a urna.

Ratígoras (asustado mira cara o público e exclama): Leo-Leo estaba no certo, estou atrapado nesta urna!!!

Fin da escena

Ratígoras na EOI de Viveiro

O BIBLIOBÚS PERCORRE A MARIÑA

Persoaxes:

• Ratígoras

Escena 1: Un bibliobús iluminado. No fondo, estanterías repletas de libros. Ratígoras está en no centro do escenario encerrado nunha furna acristalada, mirando ao seu redor con admiración.

(Ratígoras asómase ao público dentro do posible, xa que está dentro dunha furna acristalada, cunha expresión de asombro.)

Ratígoras:
Oh! Rosae sunt pulchrae in horto.
(Acompaña as súas palabras con xestos poéticos.)
A, a, am, ae, ae, a, ae, ae, as, arum, is, is.

(Lévase a man ao peito, suspirando con nostalxia.)

Ratígoras:
Oh!
(Voz en off)
Viele Jahre, molti anni, beaucoup d’annés, many years, muitos anos, ah!
(Suspira profundamente)
Cantos séculos de sabiduría e intelixencia! (Comeza a camiñar polo escenario, disfrutando do ambiente.)
E aquí estou só pero moi ben acompañado, (nota a soidade pero anímase) neste lugar tan inmaculado!
Viaxar neste bibliobús apórtame máis e máis luz!

(Pausa dramática. Detense no medio do escenario, mirando ao público con intensidade.)

Ratígoras:
Non…
(Con firmeza)
eu non son coma eses pailáns
(gesto despectivo)
que son un mar de coñecementos cun centímetro de profundidade!
(Achégase ao borde do escenario, retador.)
Quen sabe o que andan argallando…!
(Con voz potente, gritando)
Que veñan, que veñan que non lles teño medo!

(Quédase nunha postura desafiante, mirando ao público, mentras as luces se atenúan lentamente.)

Fin da escea.