A XV Exposición da Microrrede de Bibliotecas Escolares da Mariña despediuse hoxe en Viveiro cun acto de clausura marcado pola emoción, o agradecemento e a celebración do traballo compartido ao longo deste curso.
A clausura tivo tamén un fermoso broche musical da man de Cristián T.C., alumno do IES María Sarmiento, que emocionou ao público cunha coidada selección de música en galego.
A súa actuación estivo cargada de significado, xa que Cristián regresaba a un escenario moi especial para el: o mesmo espazo que anos atrás pisara sendo neno como integrante da coral do CEIP de Celeiro. Un regreso cheo de simbolismo que se converteu nun dos momentos máis emotivos da tarde.
Especialmente conmovedor foi tamén o reencontro coa súa antiga profesora de canto en primaria, Marta Pérez, compartindo un instante cheo de lembranzas, orgullo e emoción que puxo de manifesto a pegada que deixa a educación artística e musical ao longo do tempo.
Con esta clausura péchase unha nova edición da Exposición da Microrrede, quince anos de traballo compartido nos que as bibliotecas escolares continúan demostrando que son espazos para crear comunidade, fomentar a cultura e dar voz ao talento do noso alumnado.
Accede ao albúm de fotos AQUÍ.
